De Sjraveleirs oet Hier

Oetgerope Prins Roger I en Prinses Renée.

  17-1-2012: Foto's in rubriek foto's! 

Kroenversjlaag,

Um mèt d’n tied mèt te goon, zowwe veer uuch allemaol kinne pinge, wath’s uppe of op Twitter zêtte, weij ôzze nuije prins weurt….mêr veer in Hier, hawwe vân tradisies. En zoe wie veer eeder jaor tradisjioneel ôzze Sacremintsprocessie door de sjtraote vân Hier laope, zoe ginge veer es kroenraod op weeg. Op weeg langs de Bürreg in ajd Hier, ‘t boete hoes de Eyl in de Eyldergaard. ‘t Kloester in Opveld, ‘t kapelke in ‘t bos vân Opveld en de Petrus Bande Kèrrek, um zoe ôs nuij Hoeglöstig Prinsepaar 2000 + 1x 11 + 1 te goon zeuke.

Mèt de wandelsjeun ingevet ginge veer richting ‘t bos in Opveld. Veer leepe en leepe en koume langs ‘t opgeknapte Kapelke. Heij zaoge veer veutsjtep die ôs bekind veurkoume. Zie leijde ôs langs Croonenhoff de berg vân de Kruussjtraot aaf richting de Bürreg. Dao aan de vûsjvijver zaot iemes mèt ziene hingel te dobbere. Veer keke mekaar ins aan en dachte; “zow dei röstige minsj eine vân ôs kinne weure?”

Langs de jeugvelde vân de RKSV Hier, de duine aan de Sibemaweeg trokke veer via de poort vân Hier, zoe ôs dörrepke weer binne. Op ‘t kruuspunt veur de sjtopleegte sjtopte veer, um te kieke welke kant veer op môste. ‘t Waor sjtèl hè, dao waor geine hiere-polonaise vânoet de L’Ambiance. Wel hoorte veer sjtumme en dat trok ôzze aandach. Illegaal ginge veer links de sjaolsjtraot in.

De sjtumme koume vân de voetbalvelde in Laan in den Drink. Kiekend op ôs horlozje zaoge veer dat ‘t zaoterdig waor 5 oor smiddigs. En dat beteikent meh ein dingk, dân voetballe de Hierder Veterane. Einmaol langs de lijn, zaoge veer dei röstige minsj sjwingend euver ‘t veld goon. Heer maakte de ein beweiging nog sjoener es de ander. Heer scoorde zien geulke mèt. En op dat momint wiste veer ut hiel zeker; dít môt h’m zien. Dít weurt ôzze Prins vân 2000 + 1x 11 + 1.

Meh zjus wie beej edere prins, huurt ouch beej dizze ‘n prinses. Mesjiens ouch ein mèt hiel beweiglikke heupe, dachte veer. Dus trokke veer mèt die dansgedachte ‘t kruuspunt euver de dörrepsjtraot op nao bove, tot aan, boe vreuger sjlachtreijj Kicke waor. Veer hoorte muziek en dat koum vânoet de riechting Aen de Wan. Einmaol binne zaoge veer de scouting-wandelsjeun sjtoon die ôzze aandach hawwe gekrege in ‘t bos vân Opveld. Metein wiste veer dat de Prinses heij môs zien. D’r woort volop g’Switch op dei ritmiese meziek.

Prins Roger I en Prinses Renée

Waor getekent,

Maurice Luijten

Veurzitter Kroenraod C.V. De Sjraveleirs